AQSH Rossiya va Ukrainani yakuniy takliflar berishga chaqirdi
Muzokaralarda siljish bo‘lmasa, AQSH vositachilikdan chiqishi mumkin.
AQSh Davlat departamenti Rossiya va Ukraina o‘rtasidagi urushni tugatish bo‘yicha muzokaralarda sustkashlik davom etsa, Amerika bu jarayondan chiqishini rasman ma’lum qildi.
Davlat departamenti vakili Temmi Bryus Vashingtonda o‘tkazilgan brifingda davlat kotibi Marko Rubio pozitsiyasini quyidagicha bayon qildi:
“Hozir aynan shunday vaqtki, ikki tomon ham urushga qanday yakun yasash bo‘yicha aniq va amaliy takliflar bilan chiqishi lozim. Agar yaqin orada siljish bo‘lmasa, AQSh vositachilik rolidan voz kechadi”.
Bryusning so‘zlariga ko‘ra, bu borada yakuniy qarorni prezident Donald Tramp qabul qiladi.
Hozircha Moskva ham, Kiyev ham AQShning ushbu ogohlantirishiga rasmiy javob bermagan. Siyosatshunoslar bu bayonotni Vashingtonning sabr-toqatiga chek qo‘yilishi va muzokaralardagi natijasizlikdan charchaganining ishorasi sifatida baholamoqda.
