Gretsiyalik ayol ChatGPT sabab eri bilan ajrashmoqchi
ChatGPT unga erining xiyonatini bashorat qilgan.
Gretsiyada 12 yil avval turmush qurgan, ikki farzandni tarbiyalayotgan er-xotin g‘ayrioddiy sabablarga ko‘ra ajrashdi: ayol ChatGPT orqali o‘tkazilgan “soxta folbinlik” asosida erining xiyonat qilayotganiga ishondi.
Xabarlarga ko‘ra, ayol bir kuni o‘zining kofe chashkasini suratga olib, sun’iy intellektdan uni “tahlil qilib berishni” so‘ragan. ChatGPT ayolga shunday javob qaytargan: uning eri “E” harfi bilan boshlanuvchi ismga ega bo‘lgan yosh ayolga nisbatan his-tuyg‘ulari bor va ular o‘rtasida munosabat boshlanish arafasida.
Sun’iy intellektning bu “bashorati” ayolni larzaga soldi. U darhol erini uydan haydab chiqardi va ajrashish uchun ariza berdi. Avvaliga eri bu voqeani shunchaki hazil deb o'ylagan. Ammo oradan ko‘p o‘tmay u ajrashish haqida rasmiy xabarnoma olgan.
Erining aytishicha, xotini ilgari ham munajjimlar va ko‘ruvchilarga ishongan, biroq so‘nggi yillarda bunday bashoratlarga ishonmaslikka o‘rgangan edi. ChatGPTning kutilmagan javobi bu ishonchni yana uyg‘otgan ko‘rinadi.
Voqea Gretsiyada ijtimoiy munozaralarga sabab bo‘ldi. Hatto an’anaviy kofe folbinlari sun’iy intellekt “kasblarini tortib olayotgani”dan xavotirda. Ba’zilar ularni himoya qilish uchun petitsiya tashkil etishni ham taklif qilgan.
