Malta sarmoya evaziga pasport berishni to‘xtatishi mumkin
YeI sudi Malta fuqarolik dasturini noqonuniy deb topdi.
Yevropa Ittifoqi sudi Malta tomonidan xorijiy investorlar evaziga fuqarolik berish – “oltin pasport” dasturini YeI qonunchiligiga zid, deb topdi. Sud qarorida aytilishicha, hech bir a’zo davlat oldindan belgilangan to‘lovlar yoki investitsiyalar evaziga fuqarolikni taqdim eta olmaydi, chunki bu Yevropa fuqaroligini savdo ob’ektiga aylantirish degani.
Ma'lum qilinishicha, agar Malta bu dasturdan voz kechmasa, unga nisbatan moliyaviy jazo choralari ko‘riladi. Malta hukumati esa ushbu qarorning huquqiy oqibatlarini o‘rganayotganini bildirdi.
2023-yilda Yevrokomissiya bu masalada YeI sudiga murojaat qilgan edi. Komissiya fikricha, “oltin pasport” berish orqali Malta Yevropa fuqaroligi tushunchasini zaiflashtirmoqda. Chunki Malta fuqaroligini olgan shaxs avtomatik tarzda butun Yevropa hududida yashash, ishlash va hatto saylovlarda ovoz berish huquqiga ega bo‘ladi.
Malta 2013-yildan buyon bu dastur orqali xorijliklarga 600 000 yevrodan boshlab investitsiya kiritish evaziga fuqarolik bergan. 2020-yilga qadar fuqarolik olganlar mamlakatda yashamasligi ham mumkin edi. Hozir esa 3 yil yashash talabi mavjud, 750 000 yevro sarmoya kiritsangiz, bu muddat 1 yilga tushiriladi.
Ma'lumotlarga ko‘ra, ushbu dastur orqali pasport olgan ayrim shaxslar keyinchalik jinoiy javobgarlikka tortilgan, sanksiyaga uchragan yoki siyosiy jihatdan shubhali shaxslar bo‘lgan.
