Rossiyaning dron hujumlari davom etmoqda
Bir kechada 100 dan ortiq dron hujumi uyushtirildi.
Ukraina prezidenti Vladimir Zelenskiyning so‘zlariga ko‘ra, Rossiya armiyasi mamlakat shaharlari va aholi punktlariga ommaviy dron hujumlarini davom ettirmoqda.
“Xarkov, Dnipro, Dobropillye va boshqa hududlar butun tun davomida nishonga olindi. Faqat birgina tun ichida Rossiya tomonidan 100 dan ortiq hujumchi dron uchirildi. Haftaning boshidan beri esa bu son 375 taga yetdi, ularning 190 dan ortig‘i — Shahed turidagi dronlar”, — dedi Zelenskiy.
U, shuningdek, xalqaro hamjamiyatni Rossiyaga nisbatan kuchliroq iqtisodiy bosim qo‘llashga chaqirdi. “Bosim oddiy so‘z yoki diplomatik ishontirish emas, balki Rossiyani o‘t ochishni to‘xtatishga majbur qiladigan real vosita bo‘lishi kerak”, — deya ta’kidladi Ukraina prezidenti.
30-aprelga o‘tar kechasi Rossiya Dnipropetrovsk va Xarkov viloyatlariga dronlar orqali hujum uyushtirdi. Xarkovda kamida 45 kishi jarohat olgan, Dnipro shahrida esa bir fuqaro halok bo‘lgan.
