Xitoy ayrim AQSh mahsulotlarini bojdan ozod qilmoqchi
125 foiz bojdan ozod bo‘lishi mumkin bo‘lgan tovarlar ro‘yxati tayyorlandi.
Xitoy hukumati 125 foiz boj stavkasidan ozod qilinadigan AQShda ishlab chiqarilgan tovarlar ro‘yxatini tayyorlab, bu haqda ayrim kompaniyalarni shaxsiy tartibda xabardor qilmoqda.
Manbalarga ko‘ra, farmatsevtika sohasida faoliyat yurituvchi bir Amerika kompaniyasiga Xitoy rasmiylari bevosita murojaat qilgan. Ushbu kompaniya ilgari ham ayrim dori vositalari uchun bojdan ozod qilishni so‘ragan, chunki ular AQSh texnologiyalariga tayanadi.
Boshqa manba ma’lumotiga ko‘ra, Xitoyning sharqiy hududida rasmiylar xorijiy investor boj stavkalari tufayli yuzaga kelgan muammolar haqida hisobot berishni so‘ragan. Shuningdek, janubi-sharqiy mintaqadagi to‘qimachilik va yarimo‘tkazgich ishlab chiqaruvchi korxonalarga AQSh-Xitoy tariflarining biznesga ta’sirini o‘rganish uchun so‘rovlar yuborilgan.
Bu harakatlar Pekinning AQSh bilan tarif urushida ochiq murosa qilmay, lekin ichki darajada ayrim imtiyozlar orqali bosimni yumshatishga tayyorlanayotganidan dalolat beradi.
