Eron va AQSh o'rtasida 3-mayga rejalashtirilgan muzokaralar o'tkazilmaydi
Logistik muammolar sabab Eron va AQSh uchrashuvi ortga surildi.
Xabarlarga ko‘ra Eron va AQSh o‘rtasida 3-mayga belgilangan bilvosita muzokaralar logistika bilan bog‘liq muammolar sababli noma’lum muddatga qoldirildi.
Bu haqda Ummon tashqi ishlar vaziri Badr Al-Busaydi payshanba kuni ijtimoiy tarmoqlarda ma’lum qilgan.
“Logistika nuqtai nazaridan biz dastlab 3-mayga rejalashtirilgan AQSh–Eron uchrashuvini o‘tkazish vaqtini qayta ko‘rib chiqdik”, — deyiladi rasmiy bayonotda.
Ummon muzokaralarning vositachisi sifatida har ikki tomon yangi sanalar bo‘yicha kelishganidan so‘ng muzokaralarning keyingi bosqichlari haqida qo‘shimcha ma’lumot berilishini bildirgan.
Eron va AQSh o‘rtasidagi bilvosita muzokaralar 2025-yil aprel oyi o‘rtalarida boshlangan edi.
