Isroil Damashqdagi prezident qarorgohi yaqiniga aviazarbalar berdi
Hujumlar Suriyada hukumat kuchlari va mahalliy druzlar qurolli guruhlari o‘rtasidagi to‘qnashuvlar ortidan amalga oshirilgan.
Xabarlarga ko‘ra Isroil Damashqdagi muvaqqat prezident Ahmad ash-Sharaa qarorgohi yaqinidagi hududga aviazarbalar bergan. Hujumlar Suriya janubida hukumat xavfsizlik kuchlari va mahalliy druzlar qurolli guruhlari o‘rtasida keskin to‘qnashuvlar ortidan amalga oshirilgan.
Isroil Bosh vaziri Binyamin Netanyaxu va Mudofaa vaziri Israel Kats qo‘shma bayonotida shunday dedi: “Bu — Suriya rejimiga aniq signal. Agar Damashq janubiga qo‘shin yuborilsa yoki druzlar jamoasiga tahdid qilinsa, biz buni qat’iyan qoralaymiz”.
Keyinchalik Isroil Mudofaa armiyasi zarbalar aynan Damashqdagi prezident qarorgohi yaqinida bo‘lganini tasdiqladi. Isroil bu harakatni "ogohlantiruvchi chora" deb atadi va agar druz jamoasiga nisbatan hujumlar davom etsa, yanada keskin javob berilishini bildirdi.
Suriya hukumati esa bu harbiy harakatlarni inkor etib, xavfsizlik kuchlari faqat tartibni tiklash uchun yuborilganini ta’kidladi. Shu bilan birga, Suriya Inson huquqlari kuzatuv markazi to‘qnashuvlarda 100 dan ortiq odam halok bo‘lganini ma’lum qilgan.
