AQSh armiyasining 250 yilligi munosabati bilan parad bo'lib o'tadi
Parad 14-iyunda o'tkazilishi rejalashtirilgan.
2025-yil 14-iyun kuni AQSh armiyasining 250 yilligi munosabati bilan Vashingtonda yirik harbiy parad o‘tkazilishi rejalashtirilmoqda. Bu haqda Pentagon matbuot kotibi Hezer Heygan ma’lum qildi.
Paradda 150 dona harbiy texnika, 50 ta samolyot va 6600 nafar harbiy xizmatchi ishtirok etadi. Tadbir yakunida ulkan mushakbozlik namoyishi ham bo‘lib o‘tadi.
Ma'lum qilinishicha, shu kuni Vashingtonda bir kunlik festival ham tashkil qilinadi. Unda harbiy texnika ko‘rgazmalari, jonli musiqa chiqishlari va sport musobaqalari o‘tkaziladi.
AQSh mudofaa vaziri Pit Hegset bu paraddni “mamlakat tarixidagi eng yirik va eng chiroyli harbiy parad” deb atadi.
AQShda harbiy paradlar tez-tez o‘tkazilmaydi. So‘nggi marta bunday yirik tadbir 1991-yil iyun oyida bo‘lib o‘tgan.
Avvalroq Donald Tramp prezidentlik davrida Fransiyada 14-iyul Bostiliya kuni munosabati bilan o‘tkazilgan harbiy paraddan ilhomlanib, AQShda ham shunga o‘xshash tadbir tashkil qilishni taklif qilgan edi. Ammo bu g‘oya byudjet va infratuzilma sabablari tufayli amalga oshmay qolgan.
Vashington shahri ma’muriyati esa og‘ir texnikaning yo‘llarga zarar yetkazishi mumkinligidan xavotirda. Shu sababli tanklarga faqat shahardagi belgilangan yo‘llarda harakatlanishga ruxsat beriladi, ko‘priklar orqali yurish esa taqiqlanadi.
