Eldor Shomurodov “Roma”da oyning eng yaxshi fulbolchisi deb topildi
Bu Shomurodovning joriy mavsumdagi ikkinchi sovrinidir.
O‘zbekistonlik hujumchi Eldor Shomurodov “Roma” jamoasida aprel oyining eng yaxshi futbolchisi deb topildi. Bu qaror muxlislar o‘rtasida o‘tkazilgan so‘rov natijasida qabul qilindi.
Shomurodov ovoz berishda argentinalik Matias Sule va serbiyalik darvozabon Mile Svilarni ortda qoldirdi. Bu uning joriy mavsumdagi ikkinchi shaxsiy sovrinidir — u fevral oyida ham oyning eng yaxshisi deb tan olingan edi.
29 yoshli futbolchi aprel oyida to‘rtta o‘yinda maydonga tushib, ikkita gol urdi va bir golli uzatma berdi. U “Yuventus” darvozasiga muhim gol urib, jamoasini mag‘lubiyatdan qutqarib qolgan. “Verona”ga qarshi o‘yinda kiritgan yagona gol “Roma”ga g‘alaba olib keldi. “Inter” bilan bahsda esa jamoadoshi Sulega aniq pas uzatib, hal qiluvchi golga hissa qo‘shdi.
Hozirda “Roma” A Seriyada 18 o‘yindan beri mag‘lub bo‘lmayapti va turnir jadvalida 6-o‘rinni egallab turibdi.
