G‘azoda 290 ming bola o‘lim yoqasida

Isroilning ikki oydan ortiq davom etayotgan qamali sababli G‘azoda 290 mingga yaqin bola o‘lim yoqasida, 3500 dan ortiq besh yoshgacha bo‘lgan bola esa ochlikdan vafot etish xavfi ostida. Al Jazeera G‘azo hukumati ma’lumotlariga tayanib xabar berishicha, ochlik sabab 70 mingga yaqin bola kasalxonalarga yotqizilgan.

 

G‘azo hukumati xalqaro hamjamiyatni sukut saqlayotganlikda ayblab, Isroil ochlikni qurol sifatida ishlatayotganini ta’kidladi. Rasmiy ma’lumotlarga ko‘ra, blokada davrida kamida 57 nafar falastinlik ochlikdan halok bo‘lgan, 2,3 million aholining 80 foizi xalqaro yordamga muhtoj bo‘lib qolgan.

 

Isroil esa qamalni asirlarni ozod qilishga yordam beradi, deya oqlamoqda. Hozirda G‘azoda qolgan 59 nafar asirning 24 nafari tirik ekani taxmin qilinmoqda. Urush boshlangandan beri 52 mingdan ortiq falastinlik halok bo‘lgan, 118 mingdan ortig‘i yaralangan.