Xitoy kompaniyalari Tramp bojlarini chetlab o‘tyapti
Xitoydan AQShga “uchinchi davlatlar” orqali mahsulot o‘tmoqda.
Xitoy kompaniyalari AQSh prezidenti Donald Tramp tomonidan joriy etilgan yuqori import bojlarini aylanib o‘tish uchun o‘z mahsulotlarini uchinchi davlatlar orqali AQShga eksport qilmoqda. Bu haqda Financial Times nashri ma’lumot bergan.
Nashr ma'lumotlariga ko‘ra, Xitoy ijtimoiy tarmoqlarida reklama qilinayotgan xizmatlar eksportchilarga mahsulotlarni Malayziya kabi davlatlarga yuborishni, u yerda esa yangi kelib chiqish sertifikati olishni taklif qiladi. Shundan so‘ng, tovarlar “uchinchi mamlakat mahsuloti” sifatida AQShga yetkazib beriladi.
Biroq AQSh savdo qonunchiligiga ko‘ra, bunday holatda mahsulotlar yangi sertifikatga ega bo‘lishi uchun “katta o‘zgarishlar”dan o‘tgan bo‘lishi kerak. Bu esa, odatda, tovarning qayta ishlanishi yoki qayta ishlab chiqarilishi deganidir.
Maqolada ta’kidlanishicha, ayrim Xitoy kompaniyalari aynan shu talablarni qanchalik to‘liq bajarayotgani noma’lum, biroq bunday yo‘l orqali bojxona to‘lovlaridan qochish urinishlari kuchaymoqda.
