Ispaniyada quyosh nurlari hayoti uchun xavfli bo‘lgan bola aniqlandi
Noyob kasallik tufayli bola faqat quyosh botgandan keyingina tashqariga chiqishi mumkin.
Ispaniyaning Kataloniya mintaqasida istiqomat qiluvchi 12 yoshli bola noyob va og‘ir genetik kasallik – kseroderma pigmentozi tashxisi bilan yashamoqda. Bu kasallik bolaning terisini quyosh nurlariga nihoyatda sezgir qilib qo‘ygan. Shifokorlar bolaning sog‘lig‘ini himoya qilish maqsadida unga faqat quyosh botgandan keyin tashqariga chiqishga ruxsat bergan.
Mazkur kasallik ultrabinafsha nurlarga chidamsizlik bilan kechadi va teri saratoni rivojlanish xavfini keskin oshiradi. Afsuski, hozirda bu kasallikning davosi mavjud emas. Shu sababli, bola kun davomida to‘liq yopiq holda – uzun yengli kiyimlar, qo‘lqop, keng shapka, maxsus quyoshdan himoya kremi, ko‘zoynak va hatto ultrabinafsha nurlanishni o‘lchaydigan maxsus asbob bilan harakatlanishga majbur.
Faqat maktabga borish uning kunduzgi tashqariga chiqishiga istisno sifatida ruxsat etilgan, ammo bu ham faqat to‘liq himoya choralari ko‘rilgan taqdirdagina. Bolaning onasi jurnalistlarga bergan intervyusida farzandining ijtimoiy hayoti cheklanganini, do‘stlar bilan uchrashuv va oddiy bolalik quvonchlaridan mahrum bo‘lganini ta’kidlagan.
