Rossiya 100 dan ortiq ukrain dronini urib tushirdi
Dron hujumi oqibatida 13 ta aeroport faoliyati to‘xtilgan.
Rossiya Mudofaa vazirligi o'tgan tunda Ukrainadan uchirilgan 105 ta dron mamlakat havo mudofaa tizimlari tomonidan yo‘q qilinganini bildirdi. Bu haqda rasmiy bayonotda soat 21:00 dan ertalabki 04:00 gacha davom etgan hujum tafsilotlari keltirib o‘tilgan.
Moskva meri Sergey Sobyaninning so‘zlariga ko‘ra, hujum paytida poytaxtga yo‘nalgan 19 ta dron muvaffaqiyatli urib tushirilgan. Qolgan dronlar esa Rossiyaning boshqa hududlarida, xususan, bir nechta viloyatlarda to‘xtatilgan.
Dronlar hujumi tufayli Rossiyaning qator aeroportlarida parvozlar vaqtincha to‘xtatildi. “RBK”ning yozishicha, 6-mayga o‘tar kechasi 13 ta aeroportda, jumladan, Moskvaning to‘rtta aeroporti hamda Samara, Kazan, Volgograd, Saratov, Ivanovo, Yaroslavl, Kaluga va boshqa shaharlardagi aeroportlarda xavfsizlik choralari ko‘rildi va parvozlar cheklab qo‘yildi.
