Rossiya urushni to‘xtatsa, JCh-2026da qatnashishi mumkin
Infantino va Tramp Rossiyaning xalqaro futbolga qaytishi haqida fikr almashdi.
AQSh prezidenti Donald Tramp Rossiyani 2026-yilda bo‘lib o‘tadigan futbol bo‘yicha Jahon chempionatida ishtirok etishga ruxsat berish g‘oyasini ilgari surdi. Uning fikricha, bu taklif Moskva uchun Ukraina urushini to‘xtatishga turtki bo‘lishi mumkin.
Xabarlarga ko‘ra, Tramp bu fikrini FIFA prezidenti Janni Infantino bilan uchrashuvi chog‘ida bildirgan. Uchrashuv davomida u Rossiyaning 2022-yildan beri xalqaro futbol musobaqalaridan chetlashtirilganini ilk bor eshitgani aytilmoqda.
FIFA rahbari Infantino ham vaziyatga umid bilan qarayotganini bildirdi.
“Ha, hozirda Rossiya futbolchilari ishtirok eta olmaydi, ammo umid qilamizki, yaqin kelajakda tinchlik qaror topadi va ular yana xalqaro maydonlarga qaytadi,” — deya ta'kidladi.
Tramp esa ushbu holatni diplomatik imkoniyat sifatida ko‘rib, quyidagicha fikr bildirdi: “Bu amalga oshishi mumkin. Bu Rossiya uchun ijobiy rag‘bat bo‘lishi mumkin, to‘g‘rimi? Biz ularning to‘xtashini istaymiz”.
Rossiyaning sport musobaqalaridan chetlatilishi 2022-yilda Ukrainaga bostirib kirishi bilan bog‘liq xalqaro sanksiyalar doirasida amalga oshirilgan edi. 2026-yilda esa futbol bo‘yicha Jahon chempionati AQSh, Kanada va Meksika mezbonligida o‘tkazilishi belgilangan.
Bu kabi takliflar siyosat va sport o‘rtasidagi murakkab munosabatlar, shuningdek, xalqaro bosim vositalarining turli shakllarini muhokama qilish uchun yangi mavzular ochmoqda. Biroq ko‘plab mutaxassislar bunday yondashuv sportga siyosiy manipulyatsiya sifatida qaralishi mumkinligini ta’kidlashmoqda.
