Rossiyada 10-maygacha mobil aloqa cheklanadi
Bunga G‘alaba kuni arafasida xavfsizlikni ta’minlash masalalari sabab bo'lgan.
Ukraina dronlarining navbatdagi tungi hujumidan so‘ng Rossiyaning 30 dan ortiq shahrida yashovchilar mobil aloqa va internet xizmatlarida jiddiy uzilishlar haqida shikoyat qilmoqda. Xizmat ko‘rsatuvchi kompaniyalar — banklar, mobil operatorlar, yetkazib berish tarmoqlari hamda taksi ilovalari — mijozlarni faoliyatdagi vaqtincha uzilishlar haqida ogohlantirdi.
Kreml matbuot kotibi Dmitriy Peskovning so‘zlariga ko‘ra, bu cheklovlar tasodifiy emas. U bayonotida aytishicha, 9-may — Rossiyada keng nishonlanadigan G‘alaba kuni arafasida xavfsizlikni ta’minlash maqsadida mobil internet va aloqaga maxsus cheklovlar joriy etilmoqda.
“Bu xavf darajasiga qarab amalga oshirilayotgan vaqtinchalik choralar bo‘lib, 10-maygacha amal qiladi”, — dedi Peskov.
Rasmiylar bu cheklovlar asosan strategik tadbirlar, ommaviy yig‘inlar va harbiy paradlar vaqtida xavfsizlikni oshirishga qaratilganini bildirishmoqda. Biroq kuzatuvchilar nazarida, bu holat Ukrainadan kelayotgan xavflar fonida axborot oqimini nazorat ostida ushlab turish istagini ham aks ettiradi.
