Ukraina yevroga o‘tish masalasini ko‘rib chiqmoqda
Jarayon har tomonlama sifatli tayyorgarlikni talab qiladi.
Ukraina Milliy banki rahbari Andrey Pishniy mamlakat bazaviy valyuta sifatida AQSh dollaridan voz kechib, yevroga o‘tish imkonini o‘rganishni boshlaganini ma’lum qildi. Bu qaror global savdo zanjirlarining parchalanganligi va Ukraina bilan Yevropa o‘rtasidagi aloqalarning mustahkamlanishi fonida ko‘rib chiqilmoqda.
Reuters ma’lumotlariga ko‘ra, bunday jarayon murakkab bo‘lib, har tomonlama sifatli tayyorgarlikni talab qiladi. Pishniyning so‘zlariga ko‘ra, hozircha Ukraina valyuta bozorida dollarning ulushi ustun bo‘lib qolmoqda, biroq ko‘plab segmentlarda yevro bilan operatsiyalar ulushi bosqichma-bosqich oshib bormoqda.
Mutaxassislar fikricha, agar Ukraina bu o‘zgarishni amalga oshirsa, u moliya bozorlariga ta’sir qilishi va Yevropa Ittifoqi bilan iqtisodiy integratsiyani kuchaytirishi mumkin. Shu bilan birga, bu jarayon bir necha yil davom etishi va ehtiyotkorlik bilan amalga oshirilishi kutilmoqda.
