Yevropa Ittifoqi Ukrainaga Rossiya aktivlaridan 1 milliard yevro ajratdi
Ushbu yordam paketi iqtisodiy barqarorlikni ta’minlash uchun sarflanadi.
Yevropa Ittifoqi Ukraina uchun moliyaviy yordam doirasida Rossiya Federatsiyasining muzlatilgan aktivlaridan tushgan daromad hisobidan 1 milliard yevro mablag‘ni Kiyevga o‘tkazdi. Bu haqda Yevropa komissiyasining iqtisodiyot bo‘yicha vitse-prezidenti Valdis Dombrovskis o‘zining ijtimoiy tarmoqdagi sahifasida xabar berdi.
“Bugun biz yetti dastur doirasida Rossiyaning muzlatilgan aktivlaridan kelgan 45 milliard yevrolik daromaddan yana 1 milliard yevroni Ukrainaga o‘tkazdik,” — deb yozdi u.
Bu yordam paketi Yevroittifoq tomonidan Rossiyaga qarshi sanksiyalar doirasida qo‘llanilayotgan moliyaviy mexanizmlarning bir qismidir. Muzlatilgan aktivlar bo‘yicha daromadlarni Ukraina manfaatlariga yo‘naltirish G‘arb davlatlari orasida tobora kengayib borayotgan amaliyotga aylanmoqda.
Ajratilgan mablag‘lar Ukrainaga energetika infratuzilmasini tiklash, harbiy va gumanitar ehtiyojlarni qoplash, shuningdek, iqtisodiy barqarorlikni ta’minlash uchun sarflanishi rejalashtirilgan.
