Nazoratdan chiqqan sun'iy yo'ldosh yerga qaytmoqda
U 10-may kuni Buxarestga qulashi mumkin.
Nazoratdan chiqqan sobiq Sovet sun’iy yo‘ldoshi “Kosmos 482” Yerni yo‘nalishga oldi. Astronomlar bu 500 kg og‘irlikdagi apparat 10-may kuni kunduzi Yevropa hududiga qulashini taxmin qilishmoqda. Eng xavfli hududlar orasida Ruminiya poytaxti Buxarest ham bor.
Mutaxassislarning ogohlantirishicha, yo‘ldosh orbitasidagi eng kichik o‘zgarish ham uni minglab kilometrga burib yuborishi mumkin. Buxarestdan tashqari London, Budapesht, Rio-de-Janeyro, Xirosima, Pxenyan kabi yirik shaharlar ham "olov chizig‘i"da joylashgan.
Sun’iy yo‘ldosh 1972-yilda Sovet Ittifoqi tomonidan Veneraga yuborish uchun uchirilgan edi. Biroq dvigatel nosozligi sababli u orbitada qolib ketgan. Hozirda uning qolgan bir bo‘lagi Yerga 28 ming km/soat tezlikda yaqinlashmoqda.
Delft texnologiya universiteti olimi doktor Marko Langbroekning hisob-kitoblariga ko‘ra, obyekt qayerga tushishini aniq aytish qiyin, biroq zich aholi yashaydigan hududlarga tushish ehtimoli nolga teng emas.
Shunga qaramay, olimlar zarba ehtimolini meteorit urishiga qiyoslab, global darajadagi xavf yo‘qligini aytmoqda. Biroq, to‘g‘ridan-to‘g‘ri aholi yashaydigan joyga tushsa, jiddiy talafotlarga olib kelishi mumkin.
