Ispaniyada xlor ombori yonib ketdi

 

Ispaniyaning Kataloniya provinsiyasida joylashgan Clim Waterpool kimyoviy omborida sodir bo‘lgan yong‘in sabab beshta hududda favqulodda holat e’lon qilindi.

 

Yong‘in mahalliy vaqt bilan soat 02:20 da boshlanib, suzish havzalari uchun mo‘ljallangan 70 tonna xlor saqlanadigan hududda ro‘y bergan. Voqea joyi yaqinidagi aholi punktlari — Barselona provinsiyasidagi Vilanova i la Geltrú, Sant Pere de Ribes va Kubelles, shuningdek, Tarragonadagi Cunita va Kalafell aholisi darhol xavfsizlik choralarini ko‘rishga chaqirilgan. Ular uyda qolish, eshik va derazalarni ochmaslik, konditsioner ishlatmaslik haqida ogohlantirilgan.

 

Hozircha jabrlanganlar haqida rasmiy ma’lumot berilmagan. Shunga qaramay, voqea joyiga qo‘shimcha favqulodda yordam brigadalari yetkazilgan va xavfsizlikni ta’minlash maqsadida ayrim yo‘llarda harakat cheklangan.

 

Kataloniya o‘t o‘chirish xizmati yong‘in hozirda mahalliylashtirilganini bildirgan. “Yong‘inning boshqa omborlarga tarqalishiga yo‘l qo‘ymadik. Endi asosiy e’tibor tutun shleyfining zaharlilik darajasi va tarqalishini nazorat qilishga qaratilgan”, — deya izoh berdi xizmati vakillari.

 

Yong‘inni bartaraf etishga 60 nafar o‘t o‘chiruvchi, 20 nafar maxsus mutaxassis, jumladan kimyoviy razvedka va texnologik xavflarga qarshi ishlaydigan guruhlar jalb etilgan.