Pokiston Hindistonga qarshi harbiy operatsiya boshladi
Vazirliklar vaziyatni jiddiy monitoring qilmoqda.
Pokiston “Banbyan-ul-Marsus” (“Mustahkam devor”) deb nomlangan yirik harbiy operatsiyani boshlaganini eʼlon qildi. Bu haqda Geo TV telekanali xavfsizlik idoralaridagi manbalariga tayanib xabar berdi.
Avvalroq Pokiston armiyasi Hindiston tomonidan o‘z aviabazalariga raketa hujumi uyushtirilganini maʼlum qilgan va javob choralari ko‘rishini bildirgan edi. Buning ortidan mamlakat havo hududi mahalliy vaqt bilan 10 may tushgacha yopildi.
Pokiston bosh vaziri Shahboz Sharif Milliy qo‘mondonlik yig‘ilishini chaqirgan. Hukumat rasmiy sahifalarida operatsiya boshlangani eʼlon qilindi.
Manbalarga ko‘ra, Pokiston armiyasi Hindistondagi bir qator strategik nishonlarga zarbalar yo‘llagan. Xususan, BrahMos gipertovushli raketalar ombori, Udhampur va Pathankot aviabazalari, armiya shtab-kvartirasi va yirik harbiy ombor zarbaga uchragani xabar qilindi.
Hindiston rasmiylari hozircha ushbu maʼlumotlarga izoh bermagan, mahalliy OAV ham zarbalar haqida tasdiqlovchi xabarlar bermagan. Vazirliklar va xalqaro kuzatuvchilar vaziyatni jiddiy monitoring qilmoqda.
