Tramp Falastin davlatini tan olishi mumkin
Saudiya sammitida muhim bayonot e’lon qilinishi kutilmoqda.
Ma'lum qilinishicha, AQSh prezidenti Donald Tramp Saudiya Arabistonida bo‘lib o‘tadigan yirik xalqaro sammitda Falastin davlatini rasman tan olishini e’lon qilishi mumkin. Bu haqda The Media Line agentligiga tayanib, Fors ko‘rfazi davlatlaridan birining ismi sir tutilgan diplomatik manbasi ma’lum qilgan.
Manbaga ko‘ra, Tramp Falastin davlatini tan olish bo‘yicha deklaratsiya taqdim etishi rejalashtirilgan. Mazkur hujjatda Falastin davlati tuzilishi, ammo bu jarayonga HAMAS harakati jalb etilmasligi ko‘zda tutilgan.
“Agar AQSh Falastinni tan olsa, bu Yaqin Sharqdagi geosiyosiy muvozanatni tubdan o‘zgartirishi mumkin. Bu, shuningdek, “Ibrohim kelishuvlari”ga yangi davlatlarning qo‘shilishiga yo‘l ochadi”, — deya ta'kidlanadi.
Sammit doirasida iqtisodiy kelishuvlar ham e’lon qilinishi kutilmoqda. Xususan, Fors ko‘rfazi davlatlari uchun AQShning boj tariflaridan imtiyozlar taqdim etilishi mumkinligi bildirilgan.
