Yevropa Rossiya rahbarlarini sud qilmoqchi

 

Xabarlarga ko‘ra, Yevroittifoqning 27 a’zo davlatidan 20 tasi Rossiyaning siyosiy va harbiy rahbariyatini javobgarlikka tortish uchun maxsus xalqaro tribunal tashkil etilishi g‘oyasini ma’qulladi. Bugun Ukrainaning Lvov shahrida “Asosiy guruh” deb nomlangan tashabbus doirasidagi davlatlar tashqi ishlar vazirlari ushbu tribunal bo‘yicha deklaratsiyani imzoladi.

 

Yevroittifoq rasmiysining aytishicha, tribunal 20–30 nafar yuqori martabali shaxsni javobgarlikka tortishni nazarda tutadi. Sud jarayonlari yuzma-yuz yoki sirtdan bo‘lib o‘tadi. Ayblanuvchilarga 30 yilgacha ozodlikdan mahrum qilish yoki og‘ir holatlarda umrbod qamoq jazosi qo‘llanilishi mumkin.

 

AQSh bu deklaratsiyani imzolamagan davlatlar qatorida qolmoqda. Biroq Bryusselda, Vashington ham yakunda tashabbusni qo‘llab-quvvatlaydi degan umid bor. Polsha tashqi ishlar vaziri Radoslav Sikorskiy bu borada shunday dedi: “AQShning tribunalni tuzishdagi sust ishtiroki — bu Tramp ma'muriyatining Putinga taqdim etgan ko'plab imtiyozlaridan biri”.

 

Kelgusi qadam sifatida, Ukraina prezidenti Vladimir Zelenskiy ushbu tribunal bo‘yicha Yevropa Kengashi bosh kotibiga rasmiy murojaat yo‘llashi kutilmoqda. Bu murojaat 13–14 may kunlari bo‘lib o‘tadigan yig‘ilishda taqdim etiladi. Shundan so‘ng Yevropa Kengashi vazirlar qo‘mitasi rasmiy jarayonni boshlashi kerak.

 

Mazkur tribunal Ukraina hududiga bostirib kirish — ya’ni tajovuz jinoyati yuzasidan tashkil etiladi va norasmiy ravishda “Putin tribunali” nomi bilan tilga olinmoqda. Ammo DW manbalariga ko‘ra, Rossiya prezidenti, bosh vaziri va tashqi ishlar vaziri hozirda amaldagi lavozimlarida bo‘lganlari sababli “shaxsiy immunitet” bilan himoyalangan.