Eron va AQSh o‘rtasida yadro muzokaralari davom etmoqda
Aroqchiy: “Eron yadroviy huquqlaridan voz kechmaydi”.
Xabarlarga ko‘ra, Eron va AQSh yadro dasturi bo‘yicha muzokaralarning navbatdagi — to‘rtinchi bosqichi Ummon poytaxti Maskat shahrida bo‘lib o‘tdi. Muzokaralarda Eron tomonini Tashqi ishlar vaziri o‘rinbosari Abbos Aroqchiy, AQSh tomonini esa Prezidentning maxsus vakili Stiv Uitkoff vakillik qildi.
8-may kuni Uitkoff “AQSh Eronni uranni boyitishni to‘xtatishga va barcha yadroviy inshootlarni butunlay demontaj qilishga chaqirmoqda. Aks holda, Vashington boshqa yo‘lni tanlaydi", deya qat’iy bayonot berdi.
10-may kuni Aroqchiy bunga javoban shunday dedi: “Eron o‘zining hech bir yadroviy huquqidan voz kechmaydi”.
Oldingi bosqichdagi muzokaralar 12, 19 va 26-aprel kunlari Maskat va Rim shaharlarida o‘tkazilgan edi. Muzokaralarning asosiy maqsadi — Eronning yadroviy qurol ishlab chiqishining oldini olish va buning evaziga AQSh tomonidan kiritilgan iqtisodiy sanksiyalarni bekor qilish bo‘yicha yangi kelishuvga erishishdir.
