Mashhur prodyuser Donald Tramp haqida film suratga olmoqchi
Suratga olish ishlari 2025-yilda boshlanadi.
Italiya-kanadalik taniqli prodyuser Andrea Iervolino AQSh prezidenti Donald Tramp haqida katta byudjetli biografik film suratga olishni rejalashtirmoqda.
Iervolino film uchun 100 million dollarlik sarmoya jalb qilish maqsadida bo‘lajak Kann kinofestivalida potentsial investor va hamkorlar bilan muzokaralar olib boradi. Hozircha aktyorlar tarkibi ma’lum emas, biroq suratga olish ishlari 2025-yil oxirida AQShda boshlanishi rejalashtirilgan.
Xabarlarga ko‘ra, loyiha Tramp obraziga nisbatan ko‘proq “mehribon” yondashuvni tanlaydi va uni ilgari suratga olingan “Shogird” (The Apprentice) filmidan farqli uslubda aks ettiradi.
Andrea Iervolino filmni “Donald J. Trampning hayoti va merosi” haqida bo‘ladigan jasur va badiiy biopik sifatida ta’rifladi. Uning fikricha, Tramp zamonaviy siyosat va madaniyatda muhim ta’sir kuchiga ega bo‘lgan shaxsdir.
Prodyuser ilgari Andrea Bocelli haqida “Sukunat musiqasi”, Ferrari haqidagi biopik, shuningdek, Al Pachino va Keti Xolms ishtirokidagi “Asirga olingan” kabi loyihalarda ishlagan.
