Putinning taklifi – diplomatik tuzoqmi?
BILD bosh muharriri Kreml tashabbusini tanqid qildi.
15-may kuni Rossiya prezidenti Vladimir Putinning Istanbulda Ukraina bilan to‘g‘ridan-to‘g‘ri muzokaralar o‘tkazish taklifi jamoatchilik va ekspertlar orasida turlicha munosabatlarga sabab bo‘ldi. Germaniyaning yirik nashri BILD bosh muharriri Paul Rontshaymer ushbu taklifni "diplomatik tuzoq" deb atadi va Rossiyaning asl maqsadlari borasida jiddiy shubhalar bildirdi.
Rontshaymerning fikricha, G‘arb davlatlari — xususan AQSh, Yevropa Ittifoqi a’zolari va Ukraina — hozir murakkab diplomatik bosqichda turibdi. Yaqinda Kiyevda o‘tkazilgan uchrashuvda Yevropa rahbarlari va AQSh prezidenti Donald Tramp ishtirokida kamida 30 kunlik o‘t ochishni to‘xtatish bo‘yicha qat’iy talab bildirilgan edi. Aks holda, Rossiyaga qarshi yangi sanksiyalar joriy etilishi mumkin.
Putin esa o‘t ochishni to‘xtatmasdan to‘g‘ridan-to‘g‘ri muzokaralarni boshlashga tayyorligini ma’lum qildi. Ukraina prezidenti Vladimir Zelenskiy, Germaniya kansleri Fridrix Mers va Fransiya prezidenti Emmanuel Makron bu yondashuvni rad etdi. Ular tinchlik muzokaralari faqat harbiy harakatlar to‘xtatilganidan keyingina amalga oshirilishi mumkinligini ta’kidladilar.
Ekspertlar fikricha, Kreml bu taklif orqali AQSh va Yevropa o‘rtasida nizo keltirishga urinmoqda. G‘arb razvedka idoralarining bildirishicha, Rossiya urushni davom ettirish niyatida bo‘lib, bosib olingan to‘rt viloyat — Donetsk, Lugansk, Xerson va Zaporoje — ustidan nazoratni saqlab qolishga intilmoqda.
Yevropa yetakchilari ayni paytda AQSh prezidenti Donald Tramp bilan doimiy aloqada bo‘lib, uni Rossiyaning siyosiy manipulyatsiyalaridan ogoh qilishga harakat qilmoqda. Bu borada Fransiya prezidenti Emmanuel Makron muhim rol o‘ynamoqda.
Mutaxassislar ta’kidlashicha, agar Putin muzokaralar orqali G‘arb birligini zaiflashtirishga erishsa, bu Ukraina uchun salbiy oqibatlarga olib kelishi mumkin. Shu sababli, xalqaro hamjamiyatning asosiy vazifasi — murosaga emas, barqaror tinchlikka erishishdir.
