Tramp dorilarning narxini tushirishni rejalashtirmoqda
Tramp: AQSh dori narxlarida dunyo bilan tenglashadi.
AQSh prezidenti Donald Tramp mamlakatda retsept bo‘yicha beriladigan dorilar narxini 30–80 foizgacha pasaytirish rejasini e’lon qildi. U bu tashabbusni “mamlakat tarixidagi eng ta’sirli farmonlardan biri” bilan rasmiylashtirishni rejalashtirayotganini aytdi.
Tramp o‘zining Truth Social tarmog‘idagi bayonotida quyidagilarni ma’lum qildi: “Yillar davomida odamlar bir savolni so‘radi: nima uchun AQShda ayni dorilar boshqa davlatlarga qaraganda 5–10 barobar qimmatroq? Endi bu adolatsizlikka barham beriladi. Ertaga ertalab 9:00 da Oq uyda men tarixiy farmonni imzolayman. Natijada dorilar narxi deyarli darhol 30–80 foizgacha tushadi”.
Trampning ta’kidlashicha, bu qaror orqali AQSh fuqarolari boshqa davlatlar bilan teng narxlarda dori xarid qilish imkoniyatiga ega bo‘ladi. “Agar biror dori biror mamlakatda 1 dollar tursa, AQShda ham u xuddi shuncha bo‘lishi kerak”, dedi u.
Hozircha ushbu qaror qanday tartibda amalga oshirilishi aniq emas. AQShda dori narxlarini markazlashgan tartibda nazorat qilish tizimi mavjud emas. Shuningdek, ushbu chora faqat davlat tomonidan moliyalashtiriladigan Medicare dasturiga taalluqlimi yoki kengroq qamrovga ega bo‘lishi ham noma’lum. Ekspertlar bu tashabbus yirik farmatsevtika kompaniyalari tomonidan qarshilikka uchrashi mumkinligini ta’kidlamoqda.
