Yevropa Ittifoqi Ukrainani qo‘llab-quvvatlashni kuchaytirmoqda
Rossiya aktivlaridan Ukraina armiyasiga 900 million yevrolik harbiy yordam ajratiladi.
Yevropa Ittifoqi 2025-yil oxirigacha Ukraina qurolli kuchlarini qo‘llab-quvvatlash maqsadida 900 million yevro ajratadi. Ushbu mablag‘ Rossiyaning muzlatilgan aktivlaridan olinadigan daromadlar hisobidan shakllantiriladi.
Bu haqda Yevropa komissiyasining mudofaa bo‘yicha vakili Andryus Kubilus "Yevropa Ittifoqi – Ukraina harbiy hamkorligi" konferensiyasida ma’lum qildi. Unga ko‘ra, mablag‘lar Kiyev uchun qurol-yarog‘ va snaryadlar xarid qilishga yo‘naltiriladi.
Bundan tashqari, Yevropa Ittifoqining tashqi siyosat va xavfsizlik masalalari bo‘yicha yangi rahbari Kaya Kallas ham Ukraina harbiy sanoatini rivojlantirish uchun 1 milliard yevro sarmoya kiritilishini bildirgan. Ushbu mablag‘ dronlar va ilg‘or harbiy texnologiyalarni ishlab chiqarishga sarflanishi rejalashtirilmoqda.
Yevropa Ittifoqi Ukrainani qo‘llab-quvvatlash yo‘lidagi strategik harakatlarini izchil davom ettirmoqda, bu esa harbiy yordamdan tashqari, iqtisodiy va texnologik ko‘makni ham qamrab oladi.
