Turkiyada parvoz qoidalari kuchaymoqda

 

Turkiya aviakompaniyalari, jumladan Turkish Airlines, endilikda samolyot hali to‘liq to‘xtamasdan o‘z o‘rnidan turgan va yuk javonlarini ochishga uringan yo‘lovchilarga nisbatan ma’muriy choralar qo‘llaydi.

 

Turkiya Fuqarolik aviatsiyasi bosh boshqarmasi tomonidan chiqarilgan yangi nizomga muvofiq, “Xavfsizlik kamari taqing” belgisi o‘chmasidan o‘rnidan turgan yo‘lovchilar jarimaga tortiladi. Turkish Airlines ushbu tartibni amaliyotga joriy etgan ilk kompaniya sifatida e’tirof etilmoqda.

 

Aviakompaniya bort kuzatuvchilariga — ya’ni styuardessa va boshqa ekipaj a’zolariga — yangi qoidalar haqida yo‘lovchilarni ogohlantirish topshirilgan. Bort xodimlari qoidabuzarlik holatlarini qayd etib boradi va tegishli rasmiylarga yetkazadi.

 

Yangi tartibga ko‘ra, samolyot yerga qo‘ngach, faqat “xayrlashuv e’loni” yangraganidan va xavfsizlik chiroqlari o‘chgachgina o‘rindan turishga ruxsat etiladi. Aks holda, yo‘lovchi “aviadeboshir”(bezori) deb baholanadi va ma’muriy jazoga tortiladi. Hozircha jarima miqdori aniq belgilanmagan.

 

Turkish Airlines vakili Akdeniz Gerek nashriga bergan bayonotida, bu o‘zgarishlar faqat tartib uchun emas, balki yo‘lovchilar va ekipaj xavfsizligini oshirishga qaratilganini ta’kidladi. Avvallari, samolyot harakatda bo‘lgan paytda turib ketgan yo‘lovchilar va ochilgan bagaj javonlari sababli bir nechta jarohatlar qayd etilgan.

 

“Biz bu kabi xavf-xatarlarni imkon qadar kamaytirmoqchimiz”, — deyiladi kompaniya bayonotida.