COVID-19 ning yangi to'lqini Osiyoda tarqalmoqda

 

Osiyoda COVID-19 bilan kasallanish holatlarining yangi to‘lqini qayd etilmoqda. Xususan, Xitoyning Gonkong maxsus ma’muriy hududi va Singapurda infeksiyalar soni keskin oshgan.

 

Sog‘liqni saqlash organlari ma'lumotiga ko‘ra, so‘nggi oylar davomida virus yuqtirganlar soni barqaror ravishda o‘sib bormoqda. Bu esa vaqt-vaqti bilan yangi kasallik to‘lqinlarining yuzaga kelishiga olib kelmoqda. Gonkong va Singapur rasmiylari aholiga emlash kurslarini yakunlashni, ayniqsa, zaif guruhlar uchun kuchaytiruvchi (booster) dozalarning ahamiyatini yana bir bor eslatmoqda.

 

13-may kuni Gonkong Yuqumli kasalliklar bo‘limi rahbari Ou Jiazhong RTHK telekanaliga bergan intervyusida, hududda COVID-19 bilan kasallanish “yetarlicha yuqori darajaga” yetganini ta’kidladi. Unga ko‘ra, 2024-yil aprelidan beri eng ko‘p kasallanish holatlari aynan o‘tgan hafta qayd etilgan. Kasalxonalarga murojaatlar soni ham ortib bormoqda, oqova suvlardagi virus izlari esa yana yuqori darajada aniqlanmoqda.

 

COVID-19 tarqalishining oldini olishda ilgari samarali choralar ko‘rgan Singapur ham hozirda yangi to‘lqinga tayyorlanmoqda. Mamlakat Sog‘liqni saqlash vazirligi may oyida, yil davomida ilk marta yangilangan statistikani e’lon qildi. 27-apreldan 3-maygacha bo‘lgan haftada kasallanish 28 foizga, kasalxonaga yotqizishlar esa 30 foizga oshgan.