Fransiyadagi hayvonot bog'ida odamlarni yashin urdi
Hodisa oqibatida 13 kishi jarohat olgan.
2025-yil 14-may kuni Fransiyaning janubi-sharqida joylashgan Barben hayvonot bog‘ida kuchli chaqmoq tushishi oqibatida 13 nafar kishi tan jarohati oldi. Hodisa soat 15:00 atrofida Salon-de-Provans shahri yaqinidagi ochiq hududda sodir bo‘ldi.
Chaqmoq tushganidan so‘ng hududda kichik yong‘in yuzaga kelgan. Bush-dyu-Ron departamentining 46 nafar qutqaruvchisi hodisa joyiga zudlik bilan yetib borib, 15 kishini xavfli zonadan evakuatsiya qildi.
Jarohatlanganlardan biri, Germaniya fuqarosi bo‘lgan ayolning ahvoli og‘ir ekani aytilmoqda – u reanimatsiya bo‘limiga yotqizilgan. Yana 12 kishi, jumladan, to‘rt nafar bola ham shifoxonaga olib ketilgan.
Hayvonot bog‘i ma’muriyati voqea vaqtida hayvonlarga yoki bog‘ infratuzilmasiga zarar yetmaganini bildirgan. Shunga qaramay, xavfsizlik nuqtai nazaridan bog‘ vaqtincha yopilgan. Hodisa yuzasidan tergov ishlari olib borilmoqda.
Fransiya ob-havo xizmati mamlakatning bir nechta hududida kuchli momaqaldiroq xavfi saqlanib qolayotganini ma’lum qilgan va "sariq" darajadagi ogohlantirish bergan. Fuqarolarga ochiq joylardan saqlanish, momaqaldiroq vaqtida yopiq binolarda qolish tavsiya etilmoqda.
Mahalliy hukumat va qutqaruv xizmatlari voqea yuzasidan vaziyatni nazorat qilib, jabrlanganlarga zarur yordam ko‘rsatmoqda.
