Endi chiziqni bosganlik uchun kameralar jarima yozmaydi
Faqatgina “stop-liniya” bundan mustasno.
Avtomobil yo‘llarida harakat tartibini soddalashtirish va haydovchilarga qulaylik yaratish maqsadida Hukumat qarori qabul qilindi. Prezident matbuot kotibi Sherzod Asadovning xabar berishicha, bu qaror haydovchilarni qiynayotgan muammolarni bartaraf etishga qaratilgan.
Qarorga ko‘ra, 1 iyundan boshlab yo‘l chiziqlarini bosib sodir etilgan qoidabuzarliklar avtomatlashtirilgan foto va video kameralar orqali qayd etilmaydi. Faqatgina “stop-liniya” (5.33 yo‘l belgisi) bundan mustasno.
Bu o‘zgarish natijasida haydovchi tasodifan chiziqni bosib qo‘ysa, kamera orqali jarimaga tortilmaydi. Ammo YPX xodimi bu holatni aniqlasa, qoidabuzarlik mavjud tartibda rasmiylashtiriladi. Eslatib o‘tamiz, 1 iyundan jarima ballari tizimi ham kuchga kiradi.
