Rossiya muzokaralarda AQShning ishtirokiga qarshi chiqdi
Ukraina-Rossiya muzokaralari AQSh ishtirokisiz boshlanishi mumkin.
Rossiya tomoni Ukraina bilan bo‘lib o‘tadigan bevosita muzokaralarda AQSh vakillarining ishtirok etishiga qat’iy qarshi ekanini bildirdi.
Avvalroq The Guardian gazetasi AQSh Davlat departamentining siyosatni rejalashtirish bo‘yicha direktori Maykl Antonning Rossiya-Ukraina aloqalaridagi muzokaralarda AQSh nomidan ishtirok etishi mumkinligi haqida yozgan edi. Biroq Rossiya bunday ishtirokni nomaqbul deb hisoblamoqda.
Manbaga ko‘ra, muzokaralar Istanbuldagi Dolmabahche prezidentlik saroyida o‘tkaziladi. U yerda dastlab Turkiya vakili ochilish nutqi bilan chiqadi, so‘ngra muzokaralarning chinakam yopiq bosqichi boshlanadi. “Turk tomoni qisqa kirish so‘zidan so‘ng muzokaralar xonasini tark etadi”, — dedi manba.
Rossiyaning AQSh ishtirokiga qarshi pozitsiyasi, bu muloqotni faqat ikki tomon – Moskva va Kiyev o‘rtasidagi bevosita aloqaga aylantirishga bo‘lgan urinish sifatida talqin qilinmoqda. Bu esa G‘arb davlatlari, xususan AQShning muzokara jarayonidagi roliga nisbatan Moskvaning ehtiyotkorlik bilan yondashayotganini ko‘rsatadi.
