Tokioda o‘zbekistonlik yoshlardan iborat jinoyatchilar guruhi qo‘lga olindi
Ular pul o‘marishda ayblanmoqda.
Yaponiyaning Tokio shahri Shibuya tumanida 2024-yil dekabr oyida sodir bo‘lgan o‘g‘irlik va hujum ishi yuzasidan 20-21 yoshlar atrofidagi besh nafar o‘zbekistonlik yigit hibsga olindi. Bu haqda Yaponiyaning NTV telekanali Tokio politsiyasiga tayanib xabar berdi.
Ma’lumotlarga ko‘ra, 2024-yil 30-dekabr kuni soat 05:30 da Shibuya tumanidagi Maruyama-cho hududida ushbu shaxslar uch nafar chet ellik erkak va ayol bilan janjal chiqargan va ularning 210 ming iyena (taxminan 1300 dollar) qiymatdagi hamyon va sumkalarini tortib olgan. Ulardan biri yuziga urilib, jarohatlangan.
Tokio politsiyasining qo‘shimcha ma’lumotlariga ko‘ra, hibsga olinganlardan to‘rt nafari Yaponiyada noqonuniy ravishda yashab kelgan va 2023-yil avgustidan 2024-yil fevraliga qadar Shibuya hamda Shinjuku ko‘ngilochar tumanlarida spirtli ichimlik ta’siridagi fuqarolardan kredit kartalarni o‘g‘irlab, ularning hisobidan smartfonlar xarid qilib, ularni qayta sotish orqali jami 8 million iyena ishlab topgan.
Politsiya xabariga ko‘ra, jinoyat guruhining rahbari hisoblanayotgan 21 yoshli yigit hozircha advokat bilan uchrashmagunicha so‘zlashdan bosh tortmoqda. Qolgan to‘rt nafar gumondor esa ayblovlarni inkor qilgan.
