Yaponiyada irqiy kamsitish muammosi keskinlashmoqda
Yapon restoranining qarori ijtimoiy tarmoqlarda qizg‘in bahsga sabab bo‘ldi.
Yaponiyaning Osaka shahridagi restoranlarning birida xitoylik mijozlarga xizmat ko‘rsatmaslik to‘g‘risida chiqargan qarori keng jamoatchilik noroziligini keltirib chiqardi.
Restoran eshigiga osilgan yozuvda Xitoydan kelgan mehmonlarga xizmat ko‘rsatilmasligi aniq bayon etilgan. Restoran vakillari bu qarorni ba’zi xitoylik mijozlarning “qo‘pol va tartibsiz xatti-harakati” bilan izohlashgan. Ijtimoiy tarmoqlarda ushbu holat yuzasidan keskin bahs-munozaralar avj olgan — ayrimlar bu qarorni tushunishga harakat qilsa, boshqalar uni ochiq kamsitish deb baholamoqda.
Bu Yaponiya biznes sohasida xitoyliklarga nisbatan bildirilgan ilk norasmiy sanksiya emas. 2023-yilda Tokiodagi bir restoran xitoylik blogerga “Xitoy virusi” xavfini sabab qilib, kirishni taqiqlagan edi. 2024-yil iyul oyida esa boshqa bir Tokiodagi kafe xitoylik va janubiy koreyalik sayyohlarni qabul qilmasligini e’lon qilgan.
Yaponiya qonunchiligiga ko‘ra, til to‘siqlari yoki kommunikatsiya muammolari asosida mijozlarga xizmat ko‘rsatishni rad etish mumkin. Biroq mamlakat konstitutsiyasida irqiy yoki milliy belgilar asosida kamsitish qat’iyan man etiladi. Shu bois, ayrim yapon yuristlari bu kabi holatlar konstitutsiyaviy normalarga zid kelishini ta’kidlamoqda.
Bu voqea Yaponiya va Xitoy o‘rtasidagi ijtimoiy va diplomatik munosabatlarda sezilarli taranglikni yuzaga keltirishi mumkin.
