Rossiya yil oxirigacha Ukraina mudofaasini yorib o‘tadi
Mutaxassislar Rossiyaning g‘alabasiga shubha bilan qaramoqda.
Rossiya prezidenti Vladimir Putin Rossiya qo‘shinlari 2025-yil oxirigacha Ukraina sharqidagi to‘rt viloyatni to‘liq nazoratga olishini kutmoqda. Bu haqda Bloomberg agentligi prezident pozitsiyasidan xabardor manbaga tayanib xabar bermoqda.
Manbaga ko‘ra, Putin Ukrainadagi harbiy harakatlar to‘xtatilishi haqida xalqaro miqyosda davom etayotgan muzokaralarga qaramay, zarurat tug‘ilsa, o‘z maqsadlariga erishish uchun urushni uzoq muddat davom ettirishga tayyor. U, shuningdek, AQSh tomonidan joriy etilishi kutilayotgan yangi sanksiyalarga nisbatan optimistik kayfiyatda ekani ta’kidlangan.
Shu bilan birga, Londonda joylashgan Xalqaro strategik tadqiqotlar institutining katta ilmiy xodimi Ben Barri Rossiyaning bu yil oxirigacha Ukraina sharqidagi to‘rt viloyat ustidan to‘liq nazorat o‘rnatishi ehtimoli pastligini bildirgan.
Rossiya Mudofaa vazirligiga yaqin manba ham bu fikrni tasdiqlab, Ukraina dronlarining intensiv hujumlari Rossiya qo‘shinlarining keng ko‘lamli operatsiyalarini ancha murakkablashtirganini va katta yo‘qotishlarga olib kelayotganini aytgan.
