JSST moliyaviy inqirozga yuz tutmoqda
Shu sababli tashkilot xodimlarni qisqartirmoqchi.
Jahon sog‘liqni saqlash tashkiloti (JSST) moliyaviy inqiroz tufayli o‘z faoliyatida keskin qisqartirishlarga borishga majbur bo‘lmoqda. Mablag‘ yetishmovchiligi sababli tashkilot xodimlar sonini qisqartirish bilan birga, bo‘limlar sonini ham 76 tadan 34 tagacha kamaytirmoqda.
Bu haqda JSST Bosh direktori Tedros Adhanom Gebreyesus rasmiy bayonot berdi. Uning aytishicha, tashkilot rahbariyatining ijrochi tarkibi ham 14 kishidan 7 kishigacha qisqartirilgan.
Gebreyesus JSST kelgusi ikki yil ichida 500 million dollardan ortiq maosh taqchilligiga duch kelishini ma’lum qildi. Bu esa nafaqat tashkilot ichki tuzilmasiga, balki global sog‘liqni saqlash tashabbuslari va inqirozga javob choralariga ham salbiy ta’sir ko‘rsatishi mumkin.
JSST dunyo miqyosida pandemiyalar, yuqumli kasalliklar, oziqlanish muammolari va boshqa global sog‘liq muammolariga qarshi kurashda asosiy tashkilot sanaladi. Moliyaviy resurslarning kamayishi uning bu boradagi imkoniyatlarini keskin cheklashi mumkin.
