Moskvada Telegram jarimaga tortildi
Platforma axborot xavfsizligini buzishda ayblanmoqda.
Moskvadagi sud Telegram messenjeriga ikki marotaba maʼmuriy jarima solib, umumiy hisobda 2 million 800 ming rubl to‘lashga majbur qildi. Bu haqda sud matbuot xizmati xabar berdi.
Sud qaroriga ko‘ra, 800 ming rubl miqdoridagi birinchi jarima, Telegramning Rossiya Federatsiyasi axborot, axborot texnologiyalari va axborotni himoya qilish to‘g‘risidagi qonunchilik talablariga rioya qilmagani uchun belgilandi.
Ikkinchi jarima esa 2 million rublni tashkil etib, bu messenjerning shaxsiy maʼlumotlarni qayta ishlash bo‘yicha qonun talablarini bajarmagani uchun qo‘llanildi.
Telegram vakillari bu borada hozircha izoh bergani yo‘q.
Eslatib o‘tamiz, platforma Rossiyada avval ham bir necha bor tartib buzilishlar bo‘yicha jarimaga tortilgan edi.
