AQShda erkak hayoti evaziga to‘rt nafar bolani qutqardi
U o‘zining 2 nafar farzandi va ularning 2 nafar do‘stini qutqargan.
AQShning Kolorado shtatida 53 yoshli Manuel De Xesus Villanueva Miranda o‘z hayoti evaziga to‘rt nafar bolaning hayotini saqlab qoldi. U bolalarni ko‘ldan qutqarganidan so‘ng, o‘zi halok bo‘ldi.
Ma'lum qilinishicha, voqea Koloradodagi ko‘llardan birida sodir bo‘lgan. Miranda suvda to‘lqinlar kuchayib, xavf tug‘ila boshlaganini ko‘rib, o‘zining ikki farzandi va ularning ikki do‘stini qutqarishuchun sovuq suvga sakragan.
U to‘rtta bolani ham quruqlikka olib chiqqan, ammo o‘zi charchoq, sovuq suv zarbasi-ehtimoliy gipotermiya tufayli cho‘kib ketgan. Atrofdagi dam oluvchilar yordamga shoshilishgan. Biroq 40 daqiqalik reanimatsiya harakatlari natija bermagan.
Kolorado bog‘lar va yovvoyi tabiat xizmatining ma’lumotiga ko‘ra, suv harorati o‘sha paytda 10 daraja bo‘lgan. Mutaxassislar bu kabi holatlarda organizm sovuq zarbasidan jiddiy shikastlanishini ta’kidlashmoqda.
Qutqarilgan bolalar hozir xavfsiz va ularning ahvoli barqaror.
