Antarktidadagi vulqon Ispaniya harbiy bazasiga xavf solmoqda
Kuniga 80 tagacha yer silkinish holatlari ro‘y bermoqda.
Antarktidaning Desepshn orolida joylashgan Ispaniya harbiy bazasi jiddiy xavf ostida. Bunga o‘tmishda Chili va Buyuk Britaniyaning ilmiy stansiyalarini vayron qilgan faol vulqonning yana harakatga kelayotgani sabab bo‘lmoqda.
Ma'lum qilinishicha, Ispaniyaning Kadis universiteti olimi Belen Rosado boshchiligidagi vulkanologlar jamoasi oroldagi magmaning harakatini kuzatmoqda. Ularning fikriga ko‘ra, bu jarayon orol deformatsiyasiga olib kelib, vulqon og‘zining vaqti-vaqti bilan ochilib yopilishiga sabab bo‘lmoqda. Natijada Ispaniya harbiy bazasiga bevosita tahdid yuzaga kelmoqda.
2019–2020-yillarda vulqon faolligi xavf darajasini yashildan sariq signalga o‘zgartirgan. Agar hozirgi tendensiya davom etsa, yiliga 20 santimetrgacha siljish sodir bo‘lishi mumkin. Bu esa portlash ehtimolini kuchaytiradi.
Ispaniya milliy tadqiqot kengashi vakili Ramon Ortizning aytishicha, orolda kuniga 80 tagacha yer silkinishi ro‘y bermoqda. Bu, uning fikricha, katta otilish va orolni suv bosish xavfini anglatadi. Garchi joriy yilda vulqon nisbatan kamroq faollik ko‘rsatgan bo‘lsa-da, olimlar hushyorlikni yo‘qotmayapti.
2015-yilda ham shunday faollik kuzatilgan va xalqaro hamjamiyat tahdid haqida ogohlantirilgan edi.
Shunga qaramay, Desepshn oroli turistlarni o‘ziga jalb etishda davom etmoqda. O‘tgan yili Antarktidaga 125 ming sayyoh tashrif buyurgan. Issiq fumarollarli suv va Chili bazasi xarobalarida cho‘milish sayyohlar orasida mashhur. Ammo portlash xavfi hanuz real va olimlar hodisani oldindan aniqlashga harakat qilmoqda.
