AQSH Rossiyaga yetib bora oladigan raketani sinovdan o‘tkazdi
Bu sinov har yili rejali tarzda o‘tkaziladi.
AQSH 21-may kuni Minuteman III rusumidagi qit’alararo ballistik raketasini muvaffaqiyatli sinovdan o‘tkazdi. Deutsche Welle’ning yozishicha, ushbu raketa Rossiyaga yetib bora oladigan imkoniyatga ega bo‘lib, sinov Kaliforniyadagi Vandenberg aviabazasida amalga oshirilgan.
AQSH Harbiy-havo kuchlari ma’lumotlariga ko‘ra, bu sinov har yili rejali tarzda o‘tkaziladi va mamlakatning strategik yadroviy kuchlarining ishonchliligini namoyish etish hamda ittifoqchilariga xavfsizlik kafolatini ta’minlashga xizmat qiladi. Raketa bitta Mark-21 High Fidelity jangovar kallagi bilan jihozlangan bo‘lib, Tinch okeanidagi maxsus sinov hududigacha 6 700 kilometr masofani bosib o‘tgan.
Minuteman III — AQSH armiyasida 1970-yildan beri xizmat qilayotgan qattiq yoqilg‘ili qit’alararo ballistik raketadir. Uning maksimal parvoz masofasi 9 500 kilometrdan ortiq, og‘irligi taxminan 36 tonna va harakat tezligi soatiga 24 ming kilometrga yetadi. Ayni paytda Qo‘shma Shtatlar bunday 400 dona raketaga ega bo‘lib, har biri uchtagacha yadro kallagini olib yurishga qodir.
Ushbu sinov Rossiya Xavfsizlik kengashi raisi o‘rinbosari Dmitriy Medvedevning G‘arbni “uchinchi jahon urushi xavfi” bilan ogohlantirgan bayonotidan bir kun o‘tib amalga oshirildi. Medvedev Peterburg xalqaro yuridik forumida so‘zlagan nutqida G‘arb mamlakatlarining Moskvaga nisbatan olib borayotgan siyosati dunyoni global mojaroga yaqinlashtirayotganini ta’kidladi. U, shuningdek, Ukrainadagi har qanday tinchlikparvar kuchlar Rossiya uchun “qonuniy harbiy nishon” bo‘lishi mumkinligini aytdi.
