AQSH vaqtinchalik himoya olgan migrantlarni chiqarib yubormoqchi
AQSh 700 mingga yaqin migrantni chiqarib yuborishni rejalashtirmoqda.
The Washington Post nashrining yozishicha, AQSh Ichki xavfsizlik vazirligi hujjatlariga asoslanib, Tramp ma’muriyati mojaroli hududlardan qochib kelgan va vaqtinchalik himoya maqomida bo‘lgan qochqinlarni mamlakatdan chiqarib yuborish uchun 250 million dollarlik xorijiy yordam mablag‘larini sarflash rejasini ishlab chiqqan.
Rejada 200 mingdan ortiq ukrainalik va 500 mingga yaqin gaitilik migrantlar deportatsiya qilinishi mumkinligi aytilgan. Ular hozirda Bayden ma’muriyati tomonidan berilgan “vaqtinchalik muhofaza” dasturi asosida AQShda yashab kelmoqda. Shuningdek, hujjatlarda afg‘onlar, falastinliklar, liviyaliklar, sudanliklar, suriyaliklar va yamanliklar ham tilga olingan.
Loyihaga ko‘ra, ularni vatanlariga qaytarish xarajatlari xorijiy yordam jamg‘armasi hisobidan qoplangan bo‘ladi. Aslida esa bu mablag‘lar odatda qochqinlarga yordam ko‘rsatish yoki ularning vatani barqarorlashgach qaytarish uchun ajratiladi.
BMT Migratsiya tashkiloti esa bu toifadagi odamlarni vataniga majburan qaytarishni qo‘llab-quvvatlamasligini bildirgan.
AQSh Ichki xavfsizlik vazirligi matbuot kotibi Trisha Maklaflin bu hujjatlarni “eskirgan” deb atagan va Ukraina yoki Gaitiga oid hech qanday yakuniy qaror qabul qilinmaganini ta’kidlagan.
Shunga qaramay, nashrning yozishicha, o‘tgan hafta Ichki xavfsizlik vazirligi va Davlat departamenti 250 million dollar mablag‘ ajratilishini nazarda tutuvchi hujjatni imzolagan. Unda deportatsiya jarayoni tasvirlangan, biroq aynan qaysi davlat fuqarolari haqida ekani ochiqlanmagan.
