Germaniya rekord darajadagi bankrotlikka duch kelmoqda
2024-yilda 200 mingga yaqin kompaniyalar yopilgan.
Germaniyada 2024-yil davomida 196 100 ta kompaniya faoliyatini to‘xtatdi, bu esa so‘nggi o‘n yil ichida kuzatilgan eng yuqori ko‘rsatkich bo‘ldi. Bu haqda ZEW (Evropa iqtisodiy tadqiqotlar markazi) va Creditreform kredit kompaniyasi tomonidan o‘tkazilgan qo‘shma tadqiqoti xabar bermoqda.
Statistikaga ko‘ra, bankrotlik holatlari o‘tgan yilga nisbatan 16 foizga oshgan. Mutaxassislar bu holatga asosiy sabab sifatida energiyaning qimmatlashuvi, sanoat ishlab chiqarishining qisqarishi hamda eksport hajmining zaif tiklanishini ko‘rsatishgan.
Inqiroz ayniqsa energiya talab qiladigan sanoat (yopilishlar 26 foizga oshgan) va yuqori texnologiyali kompaniyalar (24 foizga oshgan) uchun og‘ir bo‘ldi. Eng ko‘p zarar ko‘rgan sohalardan yana biri — kimyo va farmatsevtika: bu segmentda 360 ga yaqin korxona bankrotlikka uchragan.
Ekspertlar bu holatni bir nechta omillar bilan bog‘lashmoqda: global raqobatning kuchayishi, ortiqcha byurokratiya, demografik inqiroz fonida malakali ishchi kuchi tanqisligi va ichki bozordagi bosimlar Germaniyadagi tadbirkorlik muhitini izdan chiqarmoqda.
