Qatar Donald Trampga samolyot sovg'a qildi
Uning qiymati 400 million dollarga teng.
Ma'lum qilinishicha, AQSh mudofaa vaziri Pit Hegset Qatarning Donald Trampga sovg‘a qilgan, qiymati 400 million dollarga teng Boeing 747 samolyotini rasman qabul qilgan.
Ushbu samolyot kelajakda AQSh prezidentining rasmiy layneri sifatida foydalanilishi rejalashtirilgan. Pentagon matbuot kotibi Shon Parnellning so‘zlariga ko‘ra, samolyotga prezident tashuvlari uchun zarur bo‘lgan xavfsizlik va funksional tizimlar integratsiya qilinadi.
Avvalroq, may oyida Qatarning Trampga “uchuvchi saroy” deb ataladigan samolyotni sovg‘a qilmoqchi ekani haqida xabarlar tarqalgan edi. Biroq bu havo kemasi “Air Force One” standartlariga mos kelishi uchun to‘liq qismlarga ajratilib, qayta yig‘ilishi, zamonaviy xavfsizlik, aloqa va boshqaruv tizimlari bilan jihozlanishi zarur. Bu jarayon bir necha yil va milliardlab dollar talab qiladi.
Qolaversa, AQSh qonunchiligiga ko‘ra, hukumat xodimlari 480 dollardan yuqori bahoga ega xorijiy sovg‘alarni qabul qila olmaydi — ular avtomatik tarzda davlat mulkiga aylantiriladi.
Donald Tramp esa bu sovg‘ani tanqid qilgan siyosiy raqiblarini “firibgarlar” va “omadsizlar” deb atab, tuhfa qabul qilish bo‘yicha bildirilgan e’tirozlarga javoban bunday fikrlarni rad etdi.
