Tokioda suv uchun to‘lov vaqtincha bekor qilindi
Qaror yozgi jaziramada aholining hayotini yengillashtirishga qaratilgan.
Yaponiyaning poytaxti Tokio shahrida yozgi jazirama tufayli aholining hayotini yengillashtirish maqsadida vaqtincha suv uchun to‘lovlar bekor qilindi. Bu haqda BBC xabar bermoqda.
Shahar hokimligi bu chora uchun 36 milliard iyena (taxminan 250 million dollar) mablag‘ ajratgan. O‘tgan yil aynan yoz mavsumida jazirama tufayli Tokioda 263 kishi vafot etgan edi. Qurbonlarning aksariyati uyida konditsioner bo‘lmagani yoki elektr xarajatlarining yuqoriligi sabab uni yoqmagan.
Tokio gubernatori Yuriko Koike bu yil ham shunday xavf mavjudligidan xavotir bildirar ekan, odamlar issiqda elektrdan foydalanmasligi mumkinligini inobatga olib, hukumat ularning xarajatlarini kamaytirishga harakat qilayotganini ta’kidladi.
Mazkur qaror aholining sog‘lig‘ini asrash, jazirama kunlarida suv va elektrdan to‘g‘ri va xavfsiz foydalanishga undash maqsadida qabul qilingan.
