Avraam Linkolnning qonli qo‘lqoplari 1,5 million dollarga sotildi

 

Chikagoda o‘tkazilgan kimoshdi savdosida AQShning 16-prezidenti Avraam Linkoln bilan bog‘liq qimmatli tarixiy artefaktlar kutilganidan ham yuqori narxlarda xarid qilindi. New York Post manbasiga ko‘ra, Linkolnning 1865-yil 14-aprel kuni — u o‘ldirilgan kechada cho‘ntagida bo‘lgan qonli qo‘lqoplari 1,5 million dollarga sotildi. O‘sha kechadagi ro‘molchasi esa 826 ming dollarga baholandi.

 

Auksionda, shuningdek, Linkoln suiqasdi bilan bog‘liq uch nafar gumonlanuvchining suratlari tushirilgan “qidiruv” plakati 762 ming dollarga xarid qilindi. 1824-yildagi daftarda yozilgan, prezidentga oid eng qadimgi qo‘lyozma namunasi esa 500 ming dollardan oshiq narxda sotildi.

 

Mazkur savdolar Freeman's/Hindman auksion uyi tomonidan Linkoln Prezident Jamg‘armasi nomidan tashkil etilgan. Jamg‘arma AQSh tarixidagi eng muhim prezidentlardan biri — Avraam Linkolnga tegishli 1500 ga yaqin artefaktni o‘z ichiga olgan kolleksiyaga egalik qiladi. Ushbu artefaktlar Kaliforniyadagi kollektsionerdan sotib olingan bo‘lib, qarzning bir qismini yopish maqsadida 144 ta buyum sotuvga qo‘yilgan.

 

Auksion yakunida 136 ta buyum sotilib, jami 7,9 million dollar yig‘ilgan. Bu mablag‘ savdoni tashkil etgan kompaniyaning komissiyasini ham o‘z ichiga oladi.

 

Avraam Linkoln 1861–1865 yillar davomida AQSh prezidenti lavozimida faoliyat yuritgan. U fuqarolar urushi chog‘ida mamlakatni boshqargan va 1863-yilda qullikni bekor qilish bo‘yicha tarixiy qaror qabul qilgan. Ikkinchi muddatining birinchi oyida, Ford teatrida suiqasd natijasida halok bo‘lgan.