AQSh Senati Rossiyaga 500 foizlik bojlar bilan tahdid qildi
Senatorlar Rossiyaga qarshi keskin iqtisodiy choralarni taklif qilmoqda.
AQSh Senatida ikki partiyaviy tashabbus asosida Rossiyaga qarshi yangi sanksiyalar loyihasi taqdim etildi. Demokrat senator Richard Blumenthal va respublikachi Lindsey Graham ilgari surgan qonun loyihasiga ko‘ra, agar Rossiya yaqin kunlarda Ukraina bilan haqiqiy tinchlikka olib kelmaydigan shartlarni ilgari sursa, unga 500 foizlik ikkilamchi bojlar joriy qilinishi mumkin.
Tashabbuskorlar bayonotida aytilishicha, ushbu loyihani 81 nafar senator qo‘llab-quvvatlamoqda. Ular AQSh davlat kotibi Marco Rubio so‘zlariga tayangan holda, Rossiyaning tez orada tinchlik shartlari bo‘yicha taklif bilan chiqishini kutmoqda.
“Bu hujjat Rossiyaning tinchlikka qanchalik jiddiy yondashayotganini aniqlashtiradi. Agar avvalgidek noaniq va haqiqatdan uzoq takliflar bo‘lsa, Senat qat’iy choralar ko‘radi”, — deyiladi senatorlarning qo‘shma bayonotida.
Mazkur tashabbus Donald Tramp va Vladimir Putin o‘rtasidagi so‘nggi muzokaralardan keyin paydo bo‘ldi. Suhbatdan so‘ng Tramp Rossiyaga nisbatan yangi sanksiyalarni qo‘llamasligini bildirgan, Kreml esa shartsiz o‘t ochishni to‘xtatishga qarshi chiqib, avval muzokara olib borilishini talab qilgan. Bu pozitsiyani Tramp ham qo‘llab-quvvatlagan.
Shunga qaramay, agar qonun loyihasi Kongressda qabul qilinsa ham, Tramp unga veto qo‘yishi mumkin. Vetoning bekor qilinishi uchun esa Senat va Vakillar palatasida uchdan ikki qism ovoz talab qilinadi — bu esa respublikachilar ustunlik qilayotgan sharoitda ancha murakkab.
