Mask siyosiy faollikdan voz kechdi
Bunga uning siyosatdan ko‘ngli qolganligi sabab bo'lmoqda.
Amerikalik milliarder Ilon Mask siyosiy faollikdan voz kechishga qaror qildi. Bu haqda u Bloomberg nashriga bergan intervyusida bayonot berib, “Men shundoq ham yetarlicha ish qildim”, — dedi.
Biroq The Washington Post gazetasi Maskga yaqin manbalarga tayanib yozishicha, bu qarorning ortida oddiygina charchoq emas, balki siyosatdan ko‘ngli qolganligi yotadi.
“Oxirgi bir yil davomida siyosat Mask hayotida markaziy o‘rinni egallagan edi. Ammo endilikda u bunga nisbatan qiziqishini yo‘qotgan”, — deydi manbalardan biri.
Gazetaning yozishicha, Mask o‘zining moliyaviy qudrati orqali AQSh siyosiy tizimiga ta’sir o‘tkazishiga ishongan. Ammo voqelik uning kutganidek bo‘lmay, bu urinishlar ko‘ngilsizlik bilan yakunlangan. Siyosiy sa’y-harakatlarining kutilgan samara bermagani Maskni umidsizlikka tushirgan.
Shuningdek, manbalarning ta’kidlashicha, Maskning bunday qarorga kelishida nafaqat siyosiy natijalarning sustligi, balki bu faoliyatning shaxsiy va moliyaviy xarajatlar jihatidan ortib borayotgani ham rol o‘ynagan.
Bundan tashqari, u o‘z xavfsizligi va oilasining tinchligi borasida tobora ko‘proq xavotir ola boshlagan. Bu esa uning siyosiy maydondan chekinish qarorini yanada qat’iylashtirgan.
