Rossiya-Ukaina o'rtasida mahbuslar almashinuvi davom etmoqda
Turkiyadagi katta kelishuv natijasida yuzlab asirlar vataniga qaytdi.
Rossiya va Ukraina o‘rtasidagi mahbuslar almashinuvi davom etmoqda, Rossiya asirligida bo‘lgan yana 307 nafar ukrainalik kecha yurtiga qaytarildi. Ukraina prezidenti Vladimir Zelenskiy bu haqda o‘zining Telegram-kanalida ma’lumot berdi.
“Yana 307 nafar ukrainalik vatanda. Turkiyada kelishilgan “1000 ga 1000” formatidagi almashuvning ikkinchi kuni. Atigi ikki kun ichida 697 nafar yurtdoshimizni ozod etdik. Ertaga ham bu jarayon davom etadi, degan umiddamiz”, — dedi Zelenskiy.
Qaytganlar orasida Ukraina Qurolli kuchlari, Davlat chegara xizmati va Milliy gvardiya harbiy xizmatchilari bor. Prezident barcha ishtirokchilarga minnatdorchilik bildirib, “maqsadimiz — barcha yurtdoshlarimizni asirlikdan qutqarish”, deya ta’kidladi.
Shuningdek, Rossiya Mudofaa vazirligi ham 307 nafar rossiyalik harbiyning Kiyev nazorati ostidagi hududlardan qaytarilganini tasdiqladi. Ular ham ushbu yirik almashinuv doirasida vatanlariga qaytarildi.
Eslatib o‘tamiz, 16-may kuni Istanbulda Rossiya va Ukraina o‘rtasida erishilgan kelishuvlarga binoan, 23-may kuni 270 nafar rossiyalik harbiy va 120 nafar tinch aholi vakillari Rossiyaga qaytarilgan edi. Shu asosda Kiyev ham o‘z navbatida 270 nafar harbiy asir va 120 nafar tinch fuqaroni qabul qilgan.
