Avstriya muhojirlarni qabul qilishdan voz kechishi mumkin

 

Avstriya hukumati muhojirlarning 2026-yil o'rtalarida oila bilan birlashish huquqini butunlay cheklashni rejalashtirmoqda. Bu haqda mamlakat kansleri Kristian Shtoker va ichki ishlar vaziri Gerxard Karner Financial Times gazetasiga bergan intervyusida ma’lum qildi.

 

Rasmiylar ta’kidlashicha, Avstriyada muhojirlar oqimi mamlakatning ta’lim, sog‘liqni saqlash va ijtimoiy xizmatlar tizimiga katta bosim qilmoqda. Shu sababli hukumat migrantlarning qarindoshlari bilan birlashishiga cheklov qo‘yuvchi kvotalar joriy etishni rejalashtirmoqda. “Bu kvota nolga teng bo‘lishi ham mumkin”, — dedi Karner.

 

Uning so‘zlariga ko‘ra, Avstriya maktablarida nemis tilini bilmaydigan bolalar soni keskin oshgan, bu esa ta’lim tizimining sifatiga jiddiy ta’sir ko‘rsatmoqda. Shuningdek, rasmiylar muhojir bolalar, ayniqsa Suriyadan kelganlar orasida jinoyatchilik darajasi oshganini qayd etishdi. So‘nggi besh yil ichida ular tomonidan mingga yaqin qonunbuzarlik holati aniqlangan.

 

Biroq bu tashabbus Yevropa Ittifoqidagi inson huquqlarini himoya qilish tamoyillari bilan ziddiyatga boradi. Qochqinlar va ularning oilalarini birlashtirish huquqi Yevropa Inson huquqlari konventsiyasi tomonidan kafolatlangan.

 

Shunga qaramay, 22-may kuni Avstriya va yana sakkizta Yevropa davlati Yevropa Inson huquqlari sudini konventsiyani “haddan tashqari keng talqin qilayotganlikda” tanqid qilib, jinoyat sodir etgan muhojirlarni chiqarib yuborishni soddalashtirishga chaqirgan edi.

 

Avstriya hukumati avvalroq, 12-mart kuni, ayniqsa Suriya va Afg‘onistondan kelgan qochqinlar oqimi sababli oilalarni birlashtirish huquqini vaqtincha to‘xtatgan edi. Rasmiy statistikaga ko‘ra, 2023-yilda ushbu dastur orqali 9,300 kishi, 2024-yilda esa 7,800 kishi mamlakatga kirgan.