Qozog‘istonda kelinni o‘g‘irlash marosimi fojia bilan yakunlandi
Avtohalokat natijasida kelin vafot etgan.
Qozog‘istonning Olmaota viloyatida kelinni o‘g‘irlash marosimi vaqtida yuz bergan yo‘l-transport hodisasi oqibatida qiz vafot etdi.
Hodisa BAKAD — katta Olmaota halqa avtomobil yo‘lida sodir bo‘lgan. Ma’lumotlarga ko‘ra, Mercedes-Benz rusumli avtomobil KIA bilan to‘qnashib, ag‘darilgan. Avariya natijasida salonda bo‘lgan kelin hodisa joyida halok bo‘lgan.
Mashinada bo‘lgan yana uch kishi, jumladan kuyov ham jarohatlangan. Avtomobil haydovchisi hibsga olingan va hozirda tergov izolyatorida saqlanmoqda. Holat yuzasidan jinoiy ish qo‘zg‘atildi.
Qozog‘istonda so‘nggi yillarda kelin o‘g‘irlash an’anasiga qarshi kurash kuchaymoqda. May oyida parlament deputati Murat Abenov nikohga majburlash jinoyatini alohida modda sifatida belgilash va yetti yilgacha ozodlikdan mahrum qilish jazosini joriy etishni taklif qilgan edi. Deputatning ta'kidlashicha, mavjud qonunchilik barcha holatlarni to‘liq qamrab ololmayapti, ko‘plab shikoyatlar esa sudgacha yetib bormaydi.
